CHETAN RAMCHURN
Dir mwa kisannla to ete?
San dir to papa ou mama so non,
Ni so profesion,
Blie to bann bout papie
Se zis degre
Dir mwa kisannla to ete ?
San koz lor to anbision
Ou to plas travay
Ou ki lekol tonn ale
Dir mwa kisannla to ete ?
San koz lor larzan
Lor to mark loto
Pa dir moi to lisien so ras
Dir mwa to kontan li
Pa dir moi ‘u know, ces gens-là’
Mo pa le lespri formate
Koz ar mwa lor Moris
Lor pli zoli pei lor later
Lor kote mistik Ganga Talao ek Amma Tookay
Dir mwa to le ed dimounn
To kontan lamisik
Sa sega angaze
Ki fer leker vibre
To ankor rapel parol lougarou ler Hollanda ti bate
Dir mwa zame to pou ase fer sime lakot
Dir mwa to konpran listwar
Kot bann oprime inn lev latet
Tonn lir lor Biko
To kontan Bellow
To kontan Chopin me to prefer Bach
Koz ar mwa lor premie fwa tonn ekout Menwar
Dir mwa to ena Montagn Bertlo lor to playlist
Dir mwa to ankor reve.